Wednesday, August 29, 2018

දෙවුදත්ගේ පාපෝච්චාරණය

වසර දෙදහස් පන්සියක් වුව, තවම මගේ නම කිළුටු හින්දා
බුදුරදුන් හැර, කිසිම මිනිසෙක්, සමාවක් මට නොදුන් හින්දා
ඇසූ පලියට, කතා පෙර කල, මගේ හිත උඹ නොදත් හන්දා
කියමි මෙලෙසට, නොකී මගෙ දුක, උඹත් අහගෙන ඉන්න හින්දා

මගේ නැඟනිය දීග යන විට දැනෙන දුක හදවතින්  වින්දා
හිත කැමත්තක් නොතිබුණත් ලොකු, පවුල් පසුබිම එදත් දින්නා
කමක් නෑ උඹ, ඉඳින් සතුටෙන්, හිසත් අතගා. නළල ඉම්බා
"මස්සිනේ මැය පණ සමයි මගේ, අදින් බාරයි උඹට නංගා"

තවම මතකයි කුස දරාගෙන, මාස ගණනක් හීන මැව්වා
පුංචි පුතුගේ අතින් අල්ලන්, ඔහුත් සමගින් ගමන් යැව්වා.
රජෙක් මා පුතු, රජෙක් මා පුතු, පියා වැනිමයි නිතර කීවා
මාස නවයෙම සතුට අළුකර අළුයමම ඈ කඳුළු සැලුවා

ලෝකයා ගේ කතා නම් මට, වැඩක් නෑ, මට වැඩක් නෑ
මගේ පොඩ්ඩිගේ කඳුළු තරමට වෙන මුකුත් මට වටින් නෑ
අනාථයි ඇගේ ජීවිතේ ප්‍රිය, අඬන බිලිඳුන් නිදන් නෑ
හිතක් නැති තිරිසනෙක් උඹ මට, මස්සිනේ උඹ තියන් නෑ.....

එයයි ඇරඹුම, මගේ මෙහෙයුමෙ පළිගැනිමට දියත් වූ
ඉතුරු ටික නම් දන්නවා ඇති, ලෝකෙටම මහ පවක් වූ
එදා අසරණ මගේ හිත දැක, තිලෝගුරු මට පිහිට වූ
බැරිවෙලාත් "බුදු" නොවුන නම්, මාද  විරුවෙකි උසස් වූ

ප.ලි. සෑම කතාවකටම පැති 360(+) ක් ඇත

Wednesday, March 28, 2018

අප්පච්චි











මිනිසා:
කිරි මව නුඹයි අපහට ලේ කිරි කරවූ
තිරිසන් වුවත් මනුසත් කම හිත රැඳවූ
උදයම දොවා ලොවටම කිරි රස බෙදවූ
පරසත් මරා කති රහකට හිත ලොබවූ

කිරි මව:
අම්මප මුන්ට අමු කැවිලද, පනිති මල
මගේ තනපුඩුව ගෙන එබුවද, කියපි බොල
කිරිකැටි පුතුට එරු කිරි ගෙන, නෙලා පල
වර පරහැත්ත නළවන්නට, කපා වල

අසා සිටි කුකුලෙක්:
උදයම නැගිටලා හිරු  පිබිදී එද්දී
කොක් හඬලලා මම උඹලව ඇහැරද්දී
රස කර කරා කෑවත් උඹ KFC
ඈ අම්ම නම්, මම උඹලගේ අප්පච්චි

ප.ලි
සියලු සත්වයන්ටම වේදනාව දැනෙති, එය හරකාට වැඩියෙන්වත්, කුකුළාට අඩුවෙන්වත්, හාල්මැස්සාට නොදැනෙන්නේවත් කියා වෙනස් වන්නේ නැත. අපි සත්ව හිංසාව පිටු දකිමු. Go Vegan

Tuesday, March 27, 2018

උපාසක මහනාම













මුදු වදන්, සිත් සතන්, සනසන්න ඇහැකි වූ
අමාමහ නිවන්මඟ සොයන්, ලොව පහලවූ
ධර්මයක්, නීති මැද නොම ගොතා සිත නිවූ
නුඹ කවුද සොයනවා, දරන් මහ ගිණි සිළු

සම හරක්, පොල් ගසා ගොඩ යන්න තනන කල
අනිත් උන් භක්තියෙන්, අන්ධ වී පුදති ඵල
එපා කී ගිය බැවින්, දමා නුඹ සඳළුතල
අද මෙහේ හදනවා පින් පතා, අන්න බල

රට වටා පිරිත්, බණ දමා ඇති හින්දාම
හොල්මනුත් නෑ උනුත් ගොසින් දෙව්ලොව, කාම
තේරුමත් නොදන්නා උපාසක, මහනාම
"සාදු" "සාදූ" කියයි, කල්ප ගණනක් තාම